ᐃᓗᓕᓪᓗᐊᑕᕆᔭᐅᔪᖅ ᓯᐊᒻᒪᑦᑕᐃᓕᒪᑎᑦᓯᓂᕐᒧᑦ ᐳᕙᓪᓗᓐᓇᖅᑐᒥᒃ ᐃᓅᓕᓴᐃᒍᑎᖃᕐᓂᖅ ᓯᓂᑦᑐᒥᒃ ᐳᕙᓪᓗᓇᖅᑐᓕᓐᓂᒃ ᐆᒻᒪᖏᓐᓂᖓᓂ ᐳᕙᓪᓗᓐᓂᕆᕐᓗᓂ. ᑕᐃᒃᑯᐊ ᓯᓂᑦᑐᒥᒃ ᐳᕙᓪᓗᓐᓇᓖᑦ (LTBI) ᐳᕙᓪᓗᐅᑦᑐᑦ, ᑭᓯᐊᓂ ᕿᑲᖅᑐᖅ. ᐋᓐᓂᐊᙱᑦᑐᑦ, ᐊᐃᑦᑐᐃᒍᓐᓇᕋᑎᓪᓗ. ᑭᓯᐊᓂᓕ, ᑖᓐᓇ ᐳᕙᓪᓗᓐᓇᖅ ᐃᓄᒻᒧᑦ ᐊᓐᓂᐊᓕᕈᑕᐅᒍᓐᓇᖅᑐᖅ ᐆᒻᒪᕐᓗᓂᓗ ᐳᕙᓪᓗᓐᓇᖅ ᐃᓅᓕᓴᖅᑕᐅᓯᒪᙱᑐᐊᕈᓂ. ᖁᐃᕿᒍᓐᓇᖅᑐᑦ, ᐆᓇᕐᓗᑎᒃ, ᓂᕆᒍᒪᑦᓯᐊᕋᑎᒃ ᐅᕿᓪᓕᕙᓪᓕᐊᑐᐃᓐᓇᕐᓗᑎᓪᓗ. ᑕᐃᒃᑯᐊ ᐆᒪᔪᒥᒃ ᐳᕙᓪᓗᓐᓂᓖᑦ ᐊᐃᑦᑐᐃᒍᓐᓇᑐᐃᓐᓇᕆᐊᖃᕐᒥᔪᑦ ᓯᐊᒻᒪᖅᑎᕆᓗᑎᓪᓗ ᐳᕙᓪᓗᓐᓇᕐᒥᒃ ᐊᓯᒥᓄᑦ. ᑕᐃᒪᐃᒻᒪᑦ ᓯᓂᑦᑐᒥᒃ ᐳᕙᓪᓗᓐᓇᓖᑦ ᐃᓅᓕᓴᐅᑎᑐᖁᔭᐅᒐᓗᐊᖅᑯᑦ ᐲᔭᖅᑕᐅᖁᓪᓗᒋᑦ ᖁᐱᕐᕈᐃᑦ ᐆᒻᒪᖏᓐᓂᖏᓐᓂ. ᐃᓅᓕᓴᖅᑕᐅᒍᑎᒃ, ᓯᓂᑦᑐᖅ ᐳᕙᓪᓗᓐᓇᖓ ᐆᒻᒪᕐᓂᐅᓴᙱᓂᖅᓴᐅᒐᔭᖅᑐᖅ ᓯᕗᓂᕐᒥ.
ᐆᒪ ᖃᐅᔨᓴᕐᓂᐅᑉ ᐱᔾᔪᑎᓪᓗᐊᑕᕆᓯᒪᔭᖓ ᓇᓗᓇᐃᖅᓯᓂᖅ ᐊᒥᓱᓂᖅᓴᐃᑦ ᐃᓄᐃᑦ ᐱᒋᐊᖃᑦᑕᕐᓂᐊᕐᒪᖔᑕ ᐱᔭᕇᕐᓗᑎᓪᓗ ᐃᓅᓕᓴᐅᑎᓂᒃ ᓯᓂᑦᑐᒧᑦ ᐳᕙᓪᓗᓐᓇᕐᒧᑦ ᐃᓅᓕᓴᖅᑕᐅᓂᖅ ᓇᐃᑦᑑᓂᖅᓴᐅᑉᐸᑦ. ᐃᒪᐃᒐᔪᑉᒪᑦ, ᐃᓄᐃᑦ ᓯᓂᑦᑐᒥᒃ ᐳᕙᓪᓗᓐᓇᓖᑦ ᐊᑕᐅᓯᕐᒥᒃ ᐄᓯᖃᑦᑐᖅᑐᑦ, INH. ᒪᕐᕈᐊᖅᑎᕐᓗᑎᒃ ᐄᓯᖃᑦᑕᕆᐊᓖᑦ ᐱᓇᓱᐊᕈᓯᕐᒥ ᑕᖅᑯᓄᑦ 9−ᓄᑦ ᓄᓇᕗᒻᒥ ᑲᑎᑦᓱᑎᒃ ᐄᓯᓂᖏᑦ 78−ᖑᑦᓱᑎᒃ. ᑕᕝᕙᓂ ᖃᐅᔨᓴᕐᓂᕐᒥ, ᐃᓚᒋᔭᐅᔪᑦ ᒪᕐᕉᓐᓂᒃ ᐃᓅᓕᓴᐅᑎᑐᖅᑐᑦ, rifapentine ᐊᒻᒪᓗ INH ᑭᓯᐊᓂ ᐊᑕᐅᓯᐊᑐᐃᓐᓇᖅᓱᑎᒃ ᐱᓇᓱᐊᕈᓯᑕᒫᑦ ᑕᖅᑭᓄᑦ ᐱᖓᓱᓄᑦ ᑲᑎᑦᓱᑎᒃ 12 ᐄᓯᓂᕆᔭᖏᑦ. ᑲᑎᑎᑕᐅᑦᓱᑎᒃ rifapentine ᐊᒻᒪᓗ INH ᑕᐃᔭᐅᔪᖅ ‘3HP’. ᖃᐅᔨᓴᕐᓂᕐᒥ ᖃᐅᔨᔭᐅᓯᒪᔪᖅ ᑕᑯᑦᓴᐅᑎᑦᓯᒋᐊᖓ 3HP ᑕᖅᑭᓄᑦ ᐱᖓᓱᓄᑦ ᐃᓅᓕᓴᐅᑕᐅᓂᖓ ᑲᔪᓯᑦᓯᐊᖅᑐᖅ ᐊᑦᑕᕐᓇᕋᓂᓗ ᑕᐃᒫᑦᓴᐃᓐᓇᖅ 9H ᐊᑐᖅᑕᐅᓲᖑᒻᒪᑦ 9−ᓄᑦ ᑕᖅᑭᓄᑦ.
ᑕᕝᕙᓂ ᖃᐅᔨᓴᕐᓂᕐᒥ ᓴᖅᑮᒍᒪᓯᒪᒐᑦᑕ 3HP ᓈᒻᒪᓐᓂᖓᓂᒃ ᐊᑦᑕᓇᙱᒋᐊᖓᓂᓪᓗ ᐃᖃᓗᓐᓂ ᕿᑭᖅᑕᕐᔪᐊᕐᒥᓗ. ᑕᒪᓐᓇ ᐊᑑᑎᔪᔭᕗᑦ ᖃᐅᔨᓴᕐᓂᖃᖅᓱᑕ ᐃᓄᓐᓂᒃ 247−ᓂᒃ ᒪᓂᒪᑎᑦᕕᐅᑦᓱᑎᒃ 3HP−ᒥᒃ (102 ᐃᖃᓗᓐᓂ ᐊᒻᒪᓗ 145 ᕿᑭᖅᑕᕐᔪᐊᕐᒥ). ᑖᒃᑯᓇᓂ ᐃᓄᓐᓂᒃ ᐃᓅᓕᓴᐅᑎᑐᓕᖅᓯᒪᔪᓂ, 82%−ᐸᓯᖏᑦ ᐃᖃᓗᓐᓂ ᐊᒻᒪᓗ 77% ᕿᑭᖅᑕᕐᔪᐊᕐᒥ ᐊᓂᒍᐃᓯᒪᔪᑦ ᐃᓅᓕᓴᐅᑎᓂᒃ. ᐊᒥᓲᓂᖅᓴᐃᑦ ᐱᔭᕇᔪᔪᑦ ᐃᓅᓕᓴᐅᑎᓂᒃ ᑕᑯᓐᓈᖅᓱᒋᑦ ᐃᓅᓕᓴᐃᓂᐅᒐᔪᑦᓯᒪᔪᖅ ᐄᓯᕙᑦᓱᑎᒃ ᖃᐅᑕᒫᑦ ᑕᖅᑭᓄᑦ 9−ᓄᑦ. ᐃᓚᖏᑦ ᐃᓄᐃᑦ ᐊᑦᑐᖅᑕᐅᓂᕐᓗᖃᑦᑕᖅᓯᒪᔪᑦ ᑕᐃᒪᐃᑦᑐᒥᒃ ᐃᓅᓕᓴᐅᑎᑐᖅᓱᑎᒃ, ᑭᓯᐊᓂ ᐊᑦᓱᐊᓘᓗᐊᙱᑦᑐᖅ ᐊᑦᑐᐃᓂᖃᖅᓯᒪᒐᓂᓗ ᖃᐅᑕᒫᑦ ᐃᓅᓯᖏᓐᓂ. ᖃᐅᔨᓯᒪᔪᒍᑦ ᑕᐃᒪᐃᑦᑐᒥᒃ ᐃᓅᓕᓴᐅᑎᑐᕐᓗᓂ, ᐱᐅᓂᖅᓴᖅ ᐃᒥᐊᓗᖃᑦᑕᖏᓪᓗᓂ ᐊᓯᖏᓐᓂᓘᓐᓃᑦ ᐄᔭᒐᖃᑦᑕᖏᓪᓗᓂ ᐊᑕᐅᓯᒃᑯᑦ. ᖃᐅᔨᓴᕐᓂᕐᒥᒃ ᖃᐅᔨᓯᒪᔪᒍᑦ 3HP ᓈᒻᒪᑦᑐᖅ ᐊᑦᑕᕐᓇᕋᓂᓗ ᐃᓅᓕᓴᐅᑎᐅᓗᓂ LTBI−ᒥᒃ ᓯᓂᑦᑐᒥᓪᓘᓐᓃᑦ ᐳᕙᓪᓗᓐᓇᕐᒥᒃ ᓄᓇᕗᒻᒥ.