ᐊᕐᕌᒍᓂ ᖁᓕᓂ ᐊᓂᒍᖅᑐᓂ, ᐊᒥᓱᙳᐸᓪᓕᐊᒪᔪᑦ ᐳᕙᓪᓗᑦᑐᑦ ᐊᑯᕐᖓᓐᓂ ᐃᓄᐃᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ. ᑕᕝᕙᓂ ᖃᐅᔨᓴᕐᓂᕐᒥ ᑐᑭᓯᑦᓯᐊᒃᑲᓐᓂᕈᒪᓯᒪᒐᑦᑕ ᐊᐃᑦᑑᑕᐅᓂᕆᕙᑦᑕᖓᓂᒃ ᐳᕙᓪᓗᓐᓇᐅᑉ ᑕᒫᓂ ᐊᑐᖅᓱᑕ ᐊᐅᓚᓂᕐᒥᒃ ᑕᐃᔭᐅᔪᒥᒃ ᐊᑕᖏᖅᑐᒥᒃ ᐊᐅᖓᓃᑦᑐᓂᒃ ᕿᒥᕐᕈᓂᖅ (WGS). WGS ᕿᒥᕐᕈᓂᖃᓲᖅ ᐃᓗᓕᖏᓐᓂᒃ ᐳᕙᓪᓗᓐᓇᐅᑉ ᖁᐱᕐᕈᐊᕐᔪᖏᑦᑕ. ᑕᐃᒪᐃᓕᐅᖅᓱᑕ, ᖃᐅᔨᓴᖅᓯᒪᔪᒍᑦ ᐱᔭᐅᔪᓂᒃ ᐳᕙᓪᓗᓐᓇᓕᓐᓂᒃ ᐳᕙᒃᑯᑦ, ᐊᑯᕐᖓᓐᓂ 2009 ᐊᒻᒪᓗ 2015, ᐃᖃᓗᓐᓂ.
ᑐᑭᓯᒃᑲᓐᓂᕋᓱᐊᖅᓱᒍ ᖃᓄᖅ ᐳᕙᓪᓗᓐᓇᖅ ᐊᐃᑦᑑᑕᐅᕙᒻᒪᖔᖅ ᐃᓄᓐᓄᑦ, ᓈᓴᐃᓯᒪᔪᒍᑦ ᖃᑦᓯᐅᓂᖏᓐᓂᒃ ᐊᐃᑦᑐᖅᑕᐅᓯᒪᔪᑦ ᐊᑯᕐᖓᓐᓂ ᐃᓄᐃᑦ ᐊᑐᖅᓱᒋᑦ ᖃᓄᐃᑦᑑᓂᖏᑦ ᖁᐱᕐᕈᐊᕐᔪᐃᑦ ᐊᐃᑦᑐᖅᑕᐅᔾᔪᑎᒋᓯᒪᔭᖏᑦ ᑲᑐᓯᐅᑎᑦᓱᒋᑦ ᑐᓴᖅᑕᐅᓯᒪᔪᑦ ᓄᐊᑕᐅᓯᒪᔪᑦ ᐋᓐᓂᐊᖅᑐᓕᕆᔨᓂᒃ. ᐃᓚᒍᑦᓯᐅᔾᔨᓯᒪᒻᒥᔪᒍᑦ ᐃᓂᒋᔭᐅᓯᒪᔪᓂᒃ ᐃᓄᓐᓄᑦ ᐳᕙᓪᓗᑦᑐᓄᑦ ᐳᓛᕆᐊᕋᔪᑦᑕᒥᓂᖏᓐᓂᒃ. ᖃᐅᔨᓴᕐᓂᐅᑉ ᐃᓗᐊᓂ ᐃᒻᒥᒃᑯᐊᖅᑎᑎᕆᔪᔪᒍᑦ 140−ᓂᒃ ᐳᕙᓪᓗᓐᓇᐅᑉ ᖁᐱᕐᕈᐊᕐᔪᖏᓐᓂᒃ 135−ᓂᒃ ᐳᕙᓪᑦᑐᓂᒃ. ᓇᓗᓇᐃᖅᓯᔪᔪᒍᑦ ᓯᑕᒪᓂᒃ ᐊᐃᑦᑐᐃᓂᕐᒨᖓᔪᓂᒃ, ᖁᐱᕐᕈᐊᕐᔪᐃᓪᓗ ᑖᒃᑯᓇᙵᓴᐃᓐᓈᖅᓯᒪᑦᓱᑎᒃ. ᐃᓚᖏᑦ ᑲᑎᒪᐅᖅᑐᑦ 62%−ᖏᑦ ᐳᕙᓪᓗᑦᑐᓕᒫᑦ ᖃᐅᔨᓴᕐᓂᐅᑉ ᐃᓗᐊᓂ ᑐᑭᓕᒃ ᑲᓱᖅᓯᒪᔪᐃᓐᓇᐅᒋᐊᖏᑦ. ᐃᓚᖓᑦ ᐊᐃᑦᑐᐃᕙᓪᓕᓂᐅᔪᖅ ᐱᒋᐊᖅᓯᒪᔪᖅ ᓯᐊᒻᒪᑦᓯᒪᑦᓱᓂᓗ ᐊᖏᕐᕋᖃᙱᑦᑐᓄᑦ ᓇᔪᒐᕐᒥ. ᐃᓚᖓᓪᓗ ᓯᐊᒻᒪᐸᓪᓕᐊᓂᖅ ᐊᑦᑐᐊᔪᖅ ᒪᑭᑦᑕᕐᕕᐅᕙᑦᑐᒧᑦ, ᐊᐃᑦᑐᐃᓂᖅᑕᖃᕆᐊᒃᑲᓐᓂᓕᖅᓱᓂ. ᓇᓗᓇᐃᖅᓯᒪᔭᕗᑦ ᐳᕙᓪᓗᓐᓇᕐᒥᒃ ᐊᐃᑦᑐᐃᓂᖅ ᐊᖏᕐᕋᖃᙱᑦᑐᒃᑯᕕᒻᒥᒃ ᓯᐊᒪᑦᓱᓂ ᐃᖃᓗᓐᓂ. ᐊᐅᓚᓂᖓ ᓇᓗᓇᐃᕈᑎᒋᓯᒪᔭᕗ ᖃᓄᖅ ᐊᐃᑦᑐᐃᓂᖅ ᐊᐅᓚᓂᖃᖅᓯᒪᒻᒪᖔᖅ ᓯᐊᒻᒪᑦᑎᕈᓐᓇᕐᓂᖓᓂᓪᓗ.
ᓇᐃᓪᓕᑎᕐᓗᒋᑦ, ᖃᐅᔨᓴᕐᓂᕗᑦ ᓇᓗᓇᐃᖅᓯᔪᖅ ᐃᓅᓯᕐᒨᖓᔪᓄᑦ ᖃᑭᒪᓇᓱᐊᕐᓂᕐᒧᓪᓗ ᐃᓕᕆᔭᐅᔪᑦ, ᐱᓗᐊᖅᑐᒥᒃ ᓇᔪᒐᖃᕐᓂᖅ ᐊᖏᕐᕋᖃᙱᑦᑐᒃᑯᕕᒻᒥ ᐊᒻᒪᓗ ᒪᑭᑦᑕᕐᕕᒻᒦᖃᑦᑕᖅᓱᓂ, ᑐᑭᓯᓇᕈᑕᐅᕙᓪᓚᐃᔪᖅ ᐊᒥᓱᙳᐸᓪᓕᐊᓂᖏᓐᓄᑦ ᐳᕙᓪᓗᑦᑐᖅ ᐃᖃᓗᓐᓂ.
